Չինաստանը զորավարժություններ է սկսել Թայվանի շրջակայքում և մտադիր է դրանց ընթացքում
վարժանքներ անցկացնել՝ կղզու հիմնական նավահանգիստներն ու տարածքները շրջափակելու և վերահսկողության տակ առնելու ուղղությամբ, ասել է Չինաստանի բանակի Արևելյան մարտական հրամանատարական գոտու ներկայացուցիչ Լի Սին։
Թայվանը զորավարժությունները որակել է «սադրանք»: «Սինհուա»-ի փոխանցմամբ՝ Ժողովրդա-ազատագրական բանակը ցամաքային, ռազմածովային ուժեր, օդուժ, հրթիռային ուժեր և այլ զորքեր է ուղարկել Թայվանի նեղուցում անցկացվող «Համատեղ սուր 2024Բ» զորավարժություններին: Վարժանքները կանցկացվեն կղզու հյուսիսային, հարավային և արևելյան հատվածներում։
Լի Սին ասել է, որ զորավարժությունների ընթացքում նավերն ու ինքնաթիռները տարբեր ուղղություններից կմոտենան Թայվանին և «համատեղ գրոհային զորավարժություններ կանցկացնեն տարասեռ հարվածային ուժերի մասնակցությամբ»։ Ռազմածովային ուժերն ու ռազմաօդային ուժերը համատեղ պարեկություն կիրականացնեն և վերապատրաստում կանցնեն՝ «արգելափակելու և վերահսկելու հիմնական նավահանգիստներն ու տարածքները, հարվածելու ծովային և ցամաքային թիրախներին»:
«Զորավարժությունները խիստ նախազգուշացում են «Թայվանի անկախության» ձգտող անջատողական ուժերին և արդար և անհրաժեշտ քայլ են ազգային ինքնիշխանությունը պաշտպանելու և ազգային միասնությունը պահպանելու համար»,- ասել է Լի Սին։Թայվանի վարչակազմը հայտարարել է, որ Չինաստանի զորավարժությունները «բացահայտ սադրանք են»:
Reuters-ի աղբյուրը կղզում կարծում է, որ Չինաստանը շրջափակում է Թայվանի հյուսիսային և հարավային նավահանգիստները և միջազգային ծովային ուղիները, ինչպես նաև հետ է մղում օտար ուժերի ժամանումը:
Թայվանը 1949 թվականից կառավարվում է սեփական վարչակազմի կողմից։ Չինաստանը կղզին համարում է իր տարածքը։