Մոսկվան և Պեկինն իսկական ընկերներ են, որոնց հարաբերություններն ուժեղ կոփում են անցել։ Այս մասին հայտարարել է Չինաստանի Ժողովրդական Հանրապետության նախագահ Սի Ցզինպինը՝ ՌԴ Անվտանգության խորհրդի քարտուղար Սերգեյ Շոյգուի հետ հանդիպմանը։
«Չինաստանը և Ռուսաստանը բարեկամական հարևաններ են, որոնք կապված են ընդհանուր սահմանով, ինչպես նաև իսկական ընկերներ, ովքեր անցել են բազմաթիվ փորձությունների միջով», — Սի Ցզինպինի խոսքերը մեջբերում է Չինաստանի կենտրոնական հեռուստատեսությունը։
ՉԺՀ-ի ղեկավարը հիշեցրել է, որ 2025 թվականին նա արդեն երկու անգամ խոսել է ՌԴ նախագահ Վլադիմիր Պուտինի հետ։ «Մենք մշակել ենք Չինաստանի և Ռուսաստանի միջև հարաբերությունների ամենաբարձր մակարդակով զարգացման ծրագիր և մանրամասն քննարկել ենք մի շարք կարևոր միջազգային և տարածաշրջանային հարցեր»,- ասել է Սի Ցզինպինը։ Նրա խոսքով, այս տարին պատմական նշանակություն ունի Մոսկվայի և Պեկինի համար. նրանք նշելու են Հայրենական մեծ պատերազմում ԽՍՀՄ հաղթանակի 80-ամյակը և Ճապոնական ագրեսիայի դեմ Դիմադրության ժողովրդական պատերազմում Չինաստանի հաղթանակի 80-ամյակը։