ԱՄՆ-ն հրաժարվել է դադարեցնել այն պատժամիջոցների գործողությունը, որոնք Իրաքին արգելում են գնել իրանական էլեկտրաէներգիա, հայտնում է Al Arabiya-ն։
«Նախագահ Թրամփը հստակ հասկացրել է, որ Իրանի ռեժիմը պետք է հրաժարվի միջուկային զենքի ստեղծման իր նկրտումներից, հակառակ դեպքում առավելագույն ճնշման կենթարկվի: Մենք հուսով ենք, որ ռեժիմը իր ժողովրդի և տարածաշրջանի շահերը վեր կդասի իր ապակայունացնող քաղաքականությունից», — Al Arabiya-ին ասել է Ազգային անվտանգության խորհրդի խոսնակ Ջեյմս Հյուիթը:
Որոշումը համապատասխանում է ազգային անվտանգության նախագահական հուշագրին, ասել է Հյուիթը՝ հավելելով, որ այն երաշխավորում է ԱՄՆ քաղաքականությունը, որն ուղղված է Իրանին տնտեսական կամ ֆինանսական օգնություն չտրամադրելուն:
«Առավելագույն ճնշման արշավը նպատակ ունի վերջ դնել Իրանի միջուկային սպառնալիքին, ձախողել բալիստիկ հրթիռների ստեղծման նրա ծրագիրը և դադարեցնել ահաբեկչական խմբավորումների աջակցությունը»,- ասել է նա։
Հյուիթն Իրանն անվանել է «էներգիայի անվստահելի մատակարարող», որը չի կարող բավարարել իր ներքին պահանջարկը և կոչ է արել Իրաքին ողջունել իր վարչապետի էներգետիկ անկախության հասնելու ձգտումը՝ իրանական աղբյուրներից իր կախվածությունը վերացնելու ճանապարհով: