Սիրիայի հյուսիսարևմտյան առափնյա շրջաններում խաղաղ բնակիչների սպանությունները պետք է անհապաղ դադարեցվեն։ Այս մասին ասվում է ՄԱԿ-ի մարդու իրավունքների գերագույն հանձնակատար Ֆոլքեր Թյուրքի հայտարարության մեջ։
«Նախկին կառավարության տարրերի և տեղացի զինված այլ մարդկանց կողմից իրականացված մի շարք համակարգված հարձակումներից հետո մենք ծայրահեղ անհանգստացնող տեղեկություններ ենք ստանում ամբողջական ընտանիքների, այդ թվում՝ կանանց, երեխաների և շարքից դուրս եկած մարտիկների, սպանությունների մասին։ Հաղորդումներ են ստացվում կրոնական հողի վրա զանգվածային մահապատիժների մասին, որոնք իրականացվել են անհայտ անձանց, ժամանակավոր կառավարության անվտանգության ուժերի աշխատակիցների, ինչպես նաև նախկին կառավարության հետ կապված տարրերի կողմից:
Ժամանակավոր իշխանությունների այն հայտարարություններին, որ նրանք մտադիր են պահպանել օրենքը, պետք է հետևեն սիրիացիների պաշտպանության անհապաղ գործողություններ, այդ թվում՝ ձեռնարկելով բոլոր անհրաժեշտ միջոցները՝ ցանկացած խախտում և չարաշահում կանխելու և պատասխանատվության ենթարկելու համար, եթե դրանք տեղի ունենան: Բոլոր սպանությունների և այլ խախտումների վերաբերյալ պետք է անցկացվի անհապաղ, թափանցիկ և անաչառ հետաքննություն, և մեղավորները պետք է պատասխանատվության ենթարկվեն միջազգային իրավունքի նորմերին և չափանիշներին համապատասխան: Քաղաքացիներին ահաբեկող խմբերը նույնպես պետք է պատասխանատվության ենթարկվեն։
Այս իրադարձությունները, ինչպես նաև ատելության խոսքի շարունակական հրահրումը ինչպես համացանցում, այնպես էլ դրանից դուրս, կրկին ցույց են տալիս համապարփակ անցումային արդարադատության գործընթացի հրատապ անհրաժեշտությունը, որը կլինի ազգային, ներառական և հիմնված ճշմարտության, արդարության և հաշվետվողականության վրա», — ասվում է ՄԱԿ-ի հանձնակատարի հայտարարության մեջ: