Ֆրանսիայի Ազգային ժողովը (խորհրդարանի ստորին պալատ) բանաձեւ է ընդունել Ուկրաինային օգնության մասին՝ կոչ անելով բռնագրավել ռուսական սառեցված ակտիվները եւ դրանք օգտագործել Կիեւին աջակցելու համար։ Քվեարկությունը հեռարձակվել է պալատի կայքում։
Բանաձեւը կրում է խորհրդանշական բնույթ։ Փաստաթղթին կողմ է քվեարկել 288 պատգամավոր, դեմ՝ 54 պատգամավոր։
Բանաձեւին աջակցել են, մասնավորապես, նախագահական «Վերածնունդ» կուսակցության պատգամավորները, սոցիալիստները, «Էկոլոգիստները», աջակողմյան «Հանրապետականներ» կուսակցությունը եւ նախկին վարչապետ Էդուար Ֆիլիպի «Հորիզոնների» պատգամավորները, որն այս պաշտոնը զբաղեցրել է 2017-2020թթ.։ Դեմ են քվեարկել ձախակողմյան «Չհնազանդված Ֆրանսիան» եւ Ֆրանսիայի կոմունիստական կուսակցությունը։ Աջակողմյան «Ազգային միասնության» պատգամավորները, որի խմբակցությունը գլխավորում է Մարին Լը Պենը, ձեռնպահ են մնացել։ Բացի Ուկրաինային օգնելուց, բանաձեւը նաեւ կոչ է անում ԵՄ-ին կառուցել անկախ եվրոպական պաշտպանություն:
Ինչպես նշել է Le Figaro թերթը, «չնայած դրա խորհրդանշական բնույթին, պատգամավորներն օգտագործում են այս բանաձեւը՝ փորձելով ճնշում գործադրել կառավարության վրա», որը կտրականապես դեմ է ռուսական սառեցված ակտիվների բռնագրավմանը։ Տարբեր գերատեսչությունների ներկայացուցիչները վերջին օրերին քանիցս հայտնել են ՌԴ ակտիվների առգրավման անթույլատրելիության մասին, քանի որ դա միջազգային իրավունքի լուրջ խախտում է։