ԱՄՆ նախագահի հատուկ բանագնաց Սթիվ Վիտկոֆը երկար չի մնացել Ռուսաստանի մայրաքաղաքում։ Դատելով հրապարակված կադրերից, որտեղ երևում է, որ նրա ավտոշարասյունը հեռանում և վերադառնում է Մոսկվայի «Վնուկովո» օդանավակայանից, նա այնտեղ մնացել է 12 ժամից մի փոքր ավելի, հայտնում է Sky News-ը։
Ինչպես հաղորդում է բրիտանական հեռուստաալիքը, թվում է, թե այս ժամանակի մեծ մասը նա ստիպված է եղել սպասել։
«Վիտկոֆը՝ անշարժ գույքի նախկին մագնատը, ով դարձել է Դոնալդ Թրամփի գլխավոր բանակցողը և հաճախ կոչվում է նախագահի «միջնորդ», ուղարկվել է Մոսկվա՝ 30-օրյա հրադադարի մասին ԱՄՆ-ի առաջարկը Վլադիմիր Պուտինին փոխանցելու։ Նրա այցը նախատեսված էր մոտավորապես շաբաթվա սկզբին՝ Սաուդյան Արաբիայում ամերիկա-ուկրաինական բանակցություններից հետո։ Սակայն հինգշաբթի օրը մոտ ճաշի ժամին ժամանելով՝ նա առնվազն ութ ժամ անգործության է մատնվել մինչև Կրեմլ կանչվելը»,- ընդգծում է լրատվամիջոցը։