ՆԱՏՕ անդամ Լեհաստանը, Լիտվան, Լատվիան եւ Էստոնիան մտադիր են դուրս գալ Օտտավայի կոնվենցիայից, որն արգելում է հակահետեւակային ականները Ռուսաստանի կողմից աճող ռազմական սպառնալիքի ֆոնին: Այս մասին ասված է չորս երկրների պաշտպանության նախարարների՝ մարտի 18-ին հրապարակված համատեղ հայտարարությունում։ «Ռազմական սպառնալիքները ՆԱՏՕ անդամ երկրներին, որոնք սահմանակից են Ռուսաստանին եւ Բելառուսին, զգալիորեն աճել են»,- ասել են Բալթյան երկրները եւ Լեհաստանը, հաղորդել է Politico-ն: https://www.politico.eu/article/poland-baltic-states-inch-closer-to-leaving-antipersonnel-mine-treaty/ Ռազմական գերատեսչությունների ղեկավարները նաեւ կարծում են, որ ներկա պայմաններում «չափազանց կարեւոր» է իրենց երկրների զինված ուժերին ապահովել «ճկունություն եւ ընտրության ազատություն»՝ զենքի նոր համակարգերի հավանական կիրառման եւ որոշումների կայացման հարցում՝ «ուժեղացնելու համար դաշինքի խոցելի արեւելյան թեւի պաշտպանությունը»։
Օտտավայի պայմանագիրը, որն արգելում է հակահետեւակային ականների օգտագործումը, կուտակումը, արտադրությունը եւ փոխանցումը, վավերացվել է 1997թ. ավելի քան 160 երկրների, բայց ոչ Ռուսաստանի Դաշնության կողմից։ Կոնվենցիան ենթարկվել է ճնշման՝ Ուկրաինա Ռուսաստանի ներխուժման պատճառով, գրել է թերթը։ Նախարարների համատեղ հայտարարությունում հայտարարված հանձնարարականը «հավանական» է դարձնում իրենց պետությունների դուրս գալը կոնվենցիայից։ Այս քայլի շնորհիվ Լեհաստանը եւ մերձբալթյան երեք երկրները կկարողանան նորից սկսել հակահետեւակային ականների կուտակումը։ «Այս որոշմամբ մենք հստակ ազդանշան ենք ուղարկում. մեր երկրները պատրաստ են եւ ի վիճակի են օգտագործել բոլոր անհրաժեշտ միջոցները մեր անվտանգության կարիքները պաշտպանելու համար»,- նշվել է փաստաթղթում։
Reuters-ի փոխանցմամբ՝ կոնվենցիայից Լիտվայի դուրս գալու մասին առանձին հայտարարություն է արել երկրի պաշտպանության նախարարության ղեկավար Դովիլե Սակալիենեն։ Նրա խոսքով՝ տարածաշրջանի սահմանների արդյունավետ պաշտպանությունն ապահովելու համար անհրաժեշտ է «պլանավորված ելք»։ Բացի այդ, դեկտեմբերին Ֆինլանդիան, որը վերջերս միացավ ՆԱՏՕ-ին, նույնպես հայտարարելէ, որ դիտարկում է համաձայնագրից դուրս գալու հարցը՝ Ռուսաստանի կողմից Ուկրաինայում հակահետեւակային ականների օգտագործման պատճառով։ Սակայն երկիրը չի ստորագրել այս հայտարարությունը։