Մինսկում կայանալիք IV Եվրասիական տնտեսական համաժողովին առցանց եւ օֆլայն եղանակով սպասվում է ավելի քան 2,7 հազար մարդու մասնակցություն։ Այս մասին հունիսի 24-ին մամուլի ասուլիսում հայտնել է Եվրասիական տնտեսական հանձնաժողովի (ԵՏՀ) մրցակցության եւ հակամենաշնորհային կարգավորման կոլեգիայի անդամ Մաքսիմ Երմոլովիչը։
Նրա խոսքով՝ IV Եվրասիական տնտեսական համաժողովին մասնակցելու համար գրանցվել է ավելի քան 2,7 հազար մասնակից։ Նրանց թվում են նրանք, ովքեր կլինեն համաժողովում Մինսկի Միջազգային ցուցահանդեսային կենտրոնում, ինչպես նաեւ նրանք, ովքեր կմիանան տեսակապի միջոցով։ Միեւնույն ժամանակ, համաժողովն արդեն ունի 288 զեկուցող եւ քննարկման մասնակից աշխարհի 26 երկրներից։
«Միջոցառումը, ինչպես սպասվում է, կլինի լայնածավալ։ Այն կներառի Եվրասիական տնտեսական միության ողջ արդիական օրակարգը եւ կապահովի զարգացման հեռանկարների համապարփակ քննարկում՝ ինչպես պետական մարմինների մակարդակով, այնպես էլ փորձագետների, գիտնականների եւ բիզնեսի ներկայացուցիչների հետ»,- ընդգծել է նախարարը։
Երմոլովիչը նշել է, որ սպասվում է Իրանի ներկայացուցիչների մասնակցությունը համաժողովին։ «Իրանում տիրող իրավիճակը ներկայում լուսաբանվում է բոլոր լրատվամիջոցների կողմից։ Մենք ուշադիր հետեւում ենք, թե ինչ է տեղի ունենում այդ երկրում։ Հաշվի առնելով ստեղծված իրավիճակը՝ մենք հույս ունենք, որ Իրանի պատվիրակությունը համաժողովին կմասնակցի ամբողջ կազմով։ Մենք ակնկալում ենք տարբեր գերատեսչությունների ներկայացուցիչների ներկայությունը։ Նույնիսկ նախքան Իրանի՝ ԵԱՏՄ դիտորդ պետություն դառնալը, մենք ակտիվորեն համագործակցել ենք նրա հետ»,- ավելացրել է Մաքսիմ Երմոլովիչը։
«Եվրասիական տնտեսական ինտեգրման ռազմավարություն. արդյունքներ եւ հեռանկարներ» թեմային նվիրված IV Եվրասիական տնտեսական համաժողովը նախատեսված է անցկացնել հունիսի 26-27-ին Մինսկում։ Համաժողովն անցկացվում է Եվրասիական տնտեսական հանձնաժողովի կողմից ԵԱՏՄ անդամ պետությունների հետ համատեղ եւ կհամընկնի պետությունների ղեկավարների մասնակցությամբ կայանալիք Եվրասիական բարձրագույն տնտեսական խորհրդի նիստին։