Կրեմլը Ռուսաստանի և Ուկրաինայի միջև հուշագրերի նախագծերի վերաբերյալ Մոսկվայի և Կիևի մոտեցումները անվանել է տրամագծորեն հակառակ։
«Երկրորդ փուլի ընթացքում փոխանակված հուշագրերի նախագծերի վերաբերյալ մոտեցումները հիմա տրամագծորեն հակառակ են, քիչ հավանական է, որ դրանք կարողանան մեկ գիշերվա ընթացքում համաձայնեցվել, դա կպահանջի շատ բարդ դիվանագիտական աշխատանք», — ասել է Վլադիմիր Պուտինի մամուլի քարտուղար Դմիտրի Պեսկովը։
Պեսկովին հարցրել են, թե արդյոք Ռուսաստանի և Ուկրաինայի նախագահների հանդիպման հեռանկարն ավելի իրատեսական է դարձել` Ստամբուլում ռուս-ուկրաինական բանակցությունների երրորդ փուլից հետո, և արդյոք Կրեմլն իրատեսական է համարում Կիևի կողմից առաջարկված օգոստոսի վերջի վերջնաժամկետը այն անցկացնելու համար։ Դրան ի պատասխան Պուտինի մամուլի քարտուղարը պատասխանել է. «Գագաթնաժողովը կարող է և պետք է վերջնական կետ դնի կարգավորման մեջ և արձանագրի բոլոր այն ձևաչափերն ու համաձայնությունները, որոնք պետք է մշակվեն փորձագիտական աշխատանքի ընթացքում։ Հակառակը անել հնարավոր չէ»։
«Հնարավո՞ր է արդյոք 30 օրում անցնել նման բարդ գործընթացով։ Դե, ակնհայտ է, որ դա քիչ հավանական է», — ասել է Պեսկովը։
Ստամբուլում բանակցությունների առաջին փուլը տեղի է ունեցել մայիսի կեսերին, երկրորդը՝ հունիսի սկզբին։ Այդ հանդիպման ժամանակ կողմերը փոխանակվեցին ռազմական գործողությունների դադարեցման պայմանների վերաբերյալ հուշագրերով։ Չորեքշաբթի երեկոյան Ստամբուլում կայացած երրորդ հանդիպման ժամանակ նախատեսվում էր քննարկել այս հուշագրերը, որոնք կողմերը անվանել էին բովանդակությամբ հակառակ։
Երրորդ փուլից հետո ուկրաինական պատվիրակության ղեկավար Ռուստեմ Ումերովը հայտարարեց, որ Կիևը Մոսկվային առաջարկել է օգոստոսի վերջին կազմակերպել նախագահներ Զելենսկու և Պուտինի հանդիպումը։