Չինաստանի նախագահ Սի Ցզինպինը Ռուսաստանի վարչապետ Միխայիլ Միշուստինի հետ հանդիպման ժամանակ հայտարարել է, որ Չինաստան-Ռուսաստան հարաբերությունները «կայուն զարգանում են»՝ չնայած անկայուն համաշխարհային իրավիճակին։
Սի Ցզինպինի խոսքով՝ «այս տարվա սկզբից, անկայուն իրավիճակի պայմաններում, Չինաստան-Ռուսաստան հարաբերությունները կայուն զարգանում են՝ ձգտելով բարձր մակարդակի և բարձրորակ զարգացման»։
«Նախագահ Պուտինի հետ մենք երկու անգամ հանդիպել ենք Մոսկվայում և Պեկինում, մանրամասն մտքեր ենք փոխանակել Չինաստան-Ռուսաստան հարաբերությունների ռազմավարական և համապարփակ հարցերի շուրջ, նախանշել ենք նոր ծրագրեր և սահմանել նոր ուղենիշներ։ Կարելի է ասել, որ ռազմավարական փոխադարձ վստահության բարձր մակարդակը և պետությունների ղեկավարների միջև սերտ շփումները համապարփակ ռազմավարական գործընկերության կայուն զարգացման հիմնական երաշխիքն են», — նշել է Չինաստանի առաջնորդը։
Նա հիշեցրեց, որ Միշուստինը և ՉԺՀ Պետական խորհրդի վարչապետ Լի Ցյանը «համապարփակ վերանայում են անցկացրել, և մենք ամրապնդել ենք երկկողմ համագործակցությունը տարբեր ոլորտներում և հասել կառուցողական արդյունքների»։
«Հուսով եմ, որ դուք կկարողանաք պահպանել սերտ համակարգումը և իրականացնել մեր պայմանավորվածությունները նախագահ Պուտինի հետ՝ հիմնվելով մեր երկու երկրների և ժողովուրդների հիմնարար շահերի վրա, և խորացնել երկկողմ համագործակցությունը՝ ոչ միայն մեր երկրների, այլև համաշխարհային զարգացման համար ավելի մեծ ներդրում ունենալու համար», — ասաց Սի Ցզինպինը։
Նա նաև Ռուսաստանի վարչապետին անվանեց չինացի ժողովրդի լավ բարեկամ և բարձր գնահատեց նրա ներդրումը Պեկինի և Մոսկվայի միջև համագործակցության զարգացման գործում։