Ադրբեջանի նախագահ Իլհամ Ալիևը իր վերջին ելույթում չի ասել, թե Սևան չկա, այլ կա Գյոյչա, նա հայտարարել է, որ ցարական Ռուսաստանի քարտեզներով Սևան չկա, այլ կա Գյոյչա։ Այս մասին նոյեմբերի 6-ին լրագրողների հետ զրույցում հայտարարել է Հայաստանի վարչապետ Նիկոլ Փաշինյանը։
«Այն քարտեզի վրա, որին հղում է արվում, Հայաստանի տեղում գրված է «Հայաստան», իսկ Ադրբեջանն ընդհանրապես չկա։ Եվ ո՞նց դա մեկնաբանել»,- նշել է նա։
Փաշինյանը հավելել է, որ հայ լրագրողներից ոչ ոք չի փորձել պարզել՝ այդ քարտեզը կա՞, թե՞ ոչ։ Նրա գնահատմամբ, այդ քարտեզը հրապարակելու դեպքում, եթե այն անբարենպաստ լինի Հայաստանի համար, ապա կարող է կրկնակի անբարենպաստ լինել Ադրբեջանի համար։
Փաշինյանը դա անօգուտ զբաղմունք է անվանել, քանի որ, ավելի վաղ դարաշրջանների քարտեզներով առաջնորդվելով, կարող է պարզվել, որ չկա ո՛չ Հայաստանի Հանրապետություն, ո՛չ Ադրբեջանի Հանրապետություն։
Հայաստանի վարչապետը դա կրկին անգամ անվանել է անիմաստ թեմա, հատկապես 2025 թվականի օգոստոսի 8-ի պայմանավորվածություններից հետո։ «Եվ ո՞վ է ասել, որ դրանք ադրբեջանական անվանումներ են։ Դրանք թուրքական, արաբական, պարսկական, մոնղոլական, ռուսական են։ Բայց ի՞նչ է դա փոխում։ Ոչինչ»,- եզրափակել է Նիկոլ Փաշինյանը։