Ռուսաստանը հայ գործընկերներից անհապաղ տեղեկություն է խնդրել Գերմանիայի «Դյուլմեն» ռազմաբազայից ռազմական տեխնիկա և տարատեսակ զինտեխնիկան Հայաստանի «Զառ» զորավարժարան տեղափոխելու ԱՄՆ ծրագրերի մասին՝ հայ-ամերիկյան հնարավոր զորավարժությունների համար։ Դրա մասին այսօր՝ մարտի 20-ին, ճեպազրույցում ասել է ՌԴ ԱԳՆ պաշտոնական ներկայացուցիչ Մարիա Զախարովան։
«Գիտեք, մենք տեսանք այդ հրապարակումները և անմիջապես հարցրինք մեր հայ գործընկերներին դրանց մասին։ Նախնական ծրագրում մեզ տեղեկացրին, որ Վաշինգտոնից նման պաշտոնական հարցումներ չեն ստացվել։ Բայց եթե այս տեղեկությունը հաստատվի, չեմ կարծում, որ հիմա պետք է հիպոթետիկ գուշակություններ անել, բայց եթե հաստատվի, ապա դա, իհարկե, ապակայունացնող գործոն կդառնա Հարավային Կովկասում կայունության և անվտանգության համար։ Եվ, իհարկե, փորձ տարածաշրջան ներմուծել առճակատման սխեմաներ, որոնք արդեն մշակվում են Եվրատլանտյան տարածաշրջանի հավաքական Արևմուտքի կողմից։ Մյուս կողմից, մենք շարունակում ենք ելնել նրանից, որ Հարավային Կովկասի երկրների ներկայիս խնդիրները պետք է լուծվեն հենց տարածաշրջանային առաջնորդների շրջանակում։ Շահագրգիռ մանրամասների համար թերևս ավելի լավ է դիմել մեր Պաշտպանության նախարարությանը, այնտեղ հավելյալ տեղեկություն ունեն։ Բայց մենք, անշուշտ, կհետևենք այս թեմային»,-նշել է Զախարովան։
Ավելի վաղ ռուսական RT գործակալությունը տեղեկություն էր հրապարակել, որ ԱՄՆ բանակի թիկունքի հրամանատարությունը նախատեսում է ռազմական տեխնիկա և տարատեսակ տեխնիկա տեղափոխել Գերմանիայի «Դյուլմեն» ռազմաբազայից Հայաստանի «Զառ» զորավարժարան՝ հնարավոր հայ-ամերիկյան զորավարժությունների համար։ Նշվում է, որ սարքավորումները Հայաստան կհասցվեն Վրաստանի տարածքով, քանի որ տրանսպորտային երթուղին չի կարող անցնել Ռուսաստանի, Թուրքիայի կամ Ադրբեջանի տարածքով՝ դիվանագիտական թույլտվություններին առնչվող դժվարությունների պատճառով։
Նշենք, որ խոսքը խաղաղապահ ուժերի վարժարանի մասին է։ Ավելի վաղ այս զորավարժարան արդեն տեղափոխվել է ամերիկյան տեխնիկա՝ համատեղ զորավարժանքներին մասնակցելու համար։
ԱՄՆ պաշտպանության նախարարությունում չեն մեկնաբանում Հայաստան ռազմական տեխնիկայի հնարավոր տեղափոխման մասին տեղեկությունը, որը հրապարակել է ռուսական RT գործակալությունը։ Դրա մասին «Արմենպրես»-ի հարցին ի պատասխան հայտնել է ԱՄՆ պաշտպանության նախարարությունը:
«Միացյալ Նահանգները բարձր է գնահատում Հայաստանի հետ մեր հարաբերությունները։ Պաշտպանության նախարարությունը չի մեկնաբանում ռազմական տեխնիկայի տեղաշարժը՝ օպերատիվ անվտանգության նկատառումներից ելնելով»,- հայտնել են ԱՄՆ պաշտպանության նախարարությունից։ Հայաստանի պաշտպանության նախարարությունը դեռևս պաշտոնական պատասխան չի տվել։