ԱՄՆ և Ռուսաստանի նախագահներ Դոնալդ Թրամփի և Վլադիմիր Պուտինի միջև զրույցը տեղի է ունեցել ռուսական կողմի նախաձեռնությամբ։ Դրա մասին, ըստ «Коммерсантъ»-ի, հայտարարել է Ռուսաստանի նախագահի օգնական Յուրի Ուշակովը։
Երկու առաջնորդներն, ըստ նրա, իրենց ժամանակի մեծ մասը քննարկել են ռուս-ուկրաինական հակամարտությունը։
«Հեռախոսազրույցի ընթացքում հատուկ շեշտադրում է կատարվել ուկրաինական ճգնաժամի վրա։ Վլադիմիր Պուտինը մանրամասն գնահատական է տվել ստեղծված իրավիճակին՝ ընդգծելով Ռուսաստանի շահագրգռվածությունը խաղաղ քաղաքական և դիվանագիտական լուծման հասնելու հարցում»,- լրագրողներին ասել է Ուշակովը։
Յուրի Ուշակովը նշել է, որ երկու երկրների ներկայացուցիչները անմիջապես կսկսեն գագաթնաժողովի նախապատրաստական աշխատանքները, որը կարող է անցկացվել Բուդապեշտում։
Նա նշել է, որ Պուտինն աջակցել է այդ եվրոպական մայրաքաղաքում հանդիպելու՝ իր ամերիկացի գործընկերոջ առաջարկին։