Ռումինիայում բացվել են ընտրատեղամասերը, որտեղ միլիոնավոր մարդիկ քվեարկում են խորհրդարանական կարևոր ընտրություններում, գրում է Euronews-ը։
Քվեարկությունը տեղի է ունենում նախագահական մրցավազքի վիճահարույց առաջին փուլից ընդամենը մեկ շաբաթ անց, որում համեմատաբար անհայտ պոպուլիստ թեկնածու Կելին Ջորջեսկուն հավաքել էր ձայների 23%-ը:
Կիրակի օրն անցկացվող խորհրդարանական մրցավազքը Ռումինիայի ամենակարևոր քվեարկությունն է, քանի որ այն որոշում է երկրի նոր կառավարությունը և վարչապետին:
Թեև նախագահը Ռումինիայում որոշումներ կայացնելու զգալի լիազորություններ ունի, հատկապես այնպիսի ոլորտներում, ինչպիսիք են ազգային անվտանգությունը և արտաքին քաղաքականությունը, սակայն կառավարությունը գլխավորում է վարչապետը:
Ջորջեսկուն ոչ սովորական քարոզարշավ էր անցկացրել՝ գրեթե ամբողջությամբ իր թեկնածությունը գովազդելով TikTok սոցիալական ցանցում: Նա զեկուցել էր զրոյական նախընտրական ծախսերի մասին, սակայն նրա ժողովրդականության հանկարծակի աճը մտահոգություններ և կասկածներ է առաջացրել անազնիվ խաղի վերաբերյալ:
Ջորջեսկուն հավաքել էր ձայների գրեթե 23%-ը, թեև նախորդ օրը ստացել էր ընդամենը 5%-ը։ Այս ցնցող արդյունքով նա մի փոքր առաջ էր անցել «Ռումինիայի փրկության միությունը» ներկայացնող Ելենա Լասկոնիից և գործող վարչապետ Մարսել Չիոլակուից՝ Սոցիալ-դեմոկրատական կուսակցությունից, որը ստացել էր ձայների 19%-ից մի փոքր ավելին:
Ծայրահեղ աջակողմյան անկախ թեկնածուն, որն իր ծայրահեղ կրոնական հայտարարությունների համար ստացել է «TikTok-ի մեսիա» անվանումը, բացահայտ հիացմունք էր հայտնել Ռուսաստանի նախագահ Վլադիմիր Պուտինի նկատմամբ։ Նրա «չեզոքության» քաղաքականությունը վեճեր է հարուցել հնարավոր արտաքին միջամտության մասին:
Ռումինիայի Սահմանադրական դատարանը հինգշաբթի օրը երկրի կենտրոնական ընտրական մարմնին պարտավորեցրել է վերահաշվարկել և ստուգել նախագահական ընտրությունների առաջին փուլում ստացված քվեաթերթիկները։
Գերագույն դատարանը նաև որոշել է հետաձգել մինչև երկուշաբթի իր լսումները ընտրությունների արդյունքները չեղարկելու պահանջի վերաբերյալ, որոշում, որը նշանակում է, որ երկու թեկնածուներն էլ չեն կարող սկսել իրենց քարոզարշավը:
Նրանք նաև կոչ են արել Եվրահանձնաժողովին հետաքննություն իրականացնել TikTok-ի նկատմամբ՝ պարզելու թե արդյոք այն խախտում է թվային ծառայությունների մասին ԵՄ օրենքը՝ ռուսամետ նախագահի թեկնածուի վրա ազդելու քարոզարշավի պատճառով:
Ըստ վերջին հարցումների՝ կիրակի կայանալիք ընտրությունների առաջին եռյակը կլինի Սոցիալ-դեմոկրատական կուսակցությունը (PSD), ծայրահեղ աջ «Հանուն Ռումինիայի միասնության» դաշինքը (AUR) և Ազգային ազատական կուսակցությունը (PNL):
Լասկոնիի «Ռումինիայի փրկության միություն» (USR) կուսակցությունը կարող է հավաքել ամենաշատ ձայները, քանի որ ութ տարի առաջ քաղաքական ասպարեզում հայտնվելուց հետո նրա ժողովրդականությունն անշեղորեն աճում է: