Շվեդիան Ուկրաինային կտրամադրի մինչ օրս իր ամենամեծ ռազմական օգնության փաթեթը՝ շուրջ 1,2 միլիարդ դոլար արժողությամբ: Այս մասին X սոցիալական ցանցում հայտնել է երկրի պաշտպանության նախարար Փոլ Ջոնսոնը։
Նախարարի խոսքով՝ այդ գումարից մոտ 90 մլն դոլարը կուղղվի ուկրաինական հեռահար հրթիռների և անօդաչու սարքերի արտադրությանը։ Ամբողջ փաթեթի մեկ քառորդը բաղկացած կլինի զենքերից, որոնք Շվեդիան կփոխանցի սեփական ռազմական ռեզերվներից։ Դրանք կներառեն 16 մարտական նավ (բացի նախկինում մատակարարված 16-ից), 1500 հակատանկային հրթիռ և 200 AT4 նռնականետ։
Շվեդիայում և եվրոպական այլ երկրներում Ուկրաինայի կարիքների համար նոր զինատեսակների արտադրության համար կհատկացվի 534 մլն դոլար, ինչը կազմում է ընդհանուր գումարի 45%-ը։ Եվս 250 մլն դոլար կուղղվի տարբեր միջազգային հիմնադրամներին։ Այդ թվում՝ 178 մլն դոլար կհատկացվի այսպես կոչված «դանական մոդելի» համար, որը նախատեսում է միջոցներ ներգրավել Ուկրաինայի ռազմարդյունաբերական համալիրին աջակցելու համար։
Շվեդիայի կառավարության կայքում նշվում է, որ սա Ուկրաինային տրամադրվող ռազմական օգնության արդեն 18-րդ փաթեթն է։ Ռուսաստանի լայնածավալ ներխուժման սկզբից ի վեր Շվեդիայի կողմից ռազմական աջակցության ընդհանուր ծավալը հասել է 61,9 միլիարդ շվեդական կրոնի (մոտ 5,4 միլիարդ եվրո):